ગોદડિયો ચોરો… શ્રી.શ્રી..શ્રી….૧૦૦૮……શ્રીમાન ચોટલી પ્રસાદ

ગોદડિયો ચોરો... શ્રી.શ્રી..શ્રી….૧૦૦૮……શ્રીમાન ચોટલી પ્રસાદ

=================================================

શ્રાવણીયા માસમાં ભગવાન ભોળાનાથના મંદિરોમાં ભાવિક ભક્તોની ભીડ જામે છે.

ખંભાત નજીક આવેલા શક્કરપુરના સિધ્ધનાથ મહાદેવે દર્શન કરી ગોદડિયા મંડળી

પરત ફરતાં મકાઇ ડોડાના સડાકા લઇ ચાલતાં ચાલતાં ચર્ચા કરતી હતી.

ધૃતરાષ્ટ્ર કહે અલ્યા કચોલા માર્ચથી આપણો ચોરો ભરાયો નથી . ગોદડિયાના સમાચાર

પણ જાણવા મલ્યા નથી. કઇ કોઠી કે કોઠામાં ભરાઇ ગયો છે ? એની ખબર નથી.

કોદાળો કહે ” માર્ચથી આપણો ઉનાળો ચાલુ થાય એટલે બાવાઓ બાપુઓ ને બાવીઓ

સાથે જનતાના પૈસે લહેર કરનારા નફ્ફ્ટ નેતાઓ વાતનુકુલિત હોલમાં કથાઓ ઉપદેશો

ને ભાષણ ઠોકવા જાય છે એમ એય મારો વા’લો ક્યાંક યુરોપ અમેરિકામાં જ હશે.” !

આવી વાતોના ફડાકા ચાલતા હતા ત્યાં જ આ ગોદડિયો સામેથી ભટકાયો ને જય ભોલે

શંખનાદ કરી મને ઉચકી તો લીધો પણ રીસમાં બબ્બે ઠોંસા ને જોરથી ધબ્બા મારી દીધા.

ધૃતરાષ્ટ્ર કહે ” અલ્યા ગોદડિયા તું આ પાટીદાર અનામત આંદોલનમાં ગયો હતો કે શું ?”

ગોરધન ગઠો કહે અલ્યા ગોદડિયા સાવણનાં સરવૈયાં ઝીલવા ઠેઠ અમેરિકાથી લોંબો થયો.

કનુ કચોલું કહે  બધી વાતોની પતર છોડો ને ગાદલા તલાવે ચોરો ભરીએ.” લો હેંડો લ્યા.”

ગોદડી નાખી બધાય ચોરાનાં ચપલાં ગોઠવાઇ ગયાં ને આઠ અડધી ચાનો ઓર્ડર કર્યો.

મેં કહ્યું  એવો ચકરાવે ચડ્યો કે ભારત પ્રવેશનો અનેરો લહાવો માણવા મલ્યો.

અઠો બઠો એકી સાથે બોલી ઉઠ્યા કે એવું શું થયુ કે ચકરાવાના ચક્કરે તું ચઢ્યો.?

“ભૈલા હું આપડી રાજધોની (રાજધાની)દલ્લીના (દિલ્હી) ઓન્દિરા ઓંધી (ઇન્દિરા ગાંધી)

એરપોર્ટ પર ઉતર્યો ને અહિંગ્રહણ  પતાવી બેગ લેવા પેલા ફરતા પટ્ટા આગળ પહોંચ્યો.”

(અહિંગ્રહણ=ઈમિગ્રેશન= પરદેશથી અહિં ભારત ઉતરો એટ્લે ગ્રહણ  લાગવાનું શરુ થાય )

“શું લાયા ? કેટલા ડોલર છે ? ત્યાં ધંધો છે નોકરી ? કેટલા ડોલરની દક્ષિણા ધરો છો ?”

મારી બેગો આવી તો એના પર જે ચુંદડી બાંધી હતી એમાં એક તંબુરો ફસાઇ ગયો હતો.

બેલ્ટ પરથી બેગો જેમ તેમ ખેંચી કાઢી તો સાથોસાથ તંબુરો પણ ખેંચાઇ આવ્યો.

હું બેગો હાથલારી (ટ્રોલી) પર મુકતો હતો ત્યાં કોઇ મારો ખભો હચમચાવી ને મૃદુલ અવાજે

હરે નારાયણ નારાયણનો પોકાર કરતા હતા.લેંઘા ઝબ્ભાના પહેરવેશમાં એક પચાસેક

વરસના પ્રૌઢ સજ્જન ભટકાયા.

મને કહે ઓ સજ્જન મહાશય આપનું શુભ નામ ને ક્યાંથી આવો છો.?

મેં કહ્યું મારું નામ” ગોવિંદ ગોદડિયો છે. અમેરિકાથી આવું છું. ગુજરાતનો વતની છું.”

” અહોહોહોહો પેલા ગોદડિયા ચોરાવાળા ખરું ને!. હા તમે પર્મેશ્વરીય પરિષદ ને યમરાજા

ને ભારતના રાજકારણીયો વિષે લખ્યું હતું ઇવડા ઇ જ ને ?””

મને થયું ચોક્કસ આ આઇબી નો કે સીબીઆઇનો માણસ હશે. ધરપકડ જરુર થવાની.

પેલા સજ્જન મહાપુરુષે મંદ મંદ સુમધુર હાસ્ય રેલાવતાં એમનું વિઝિટીંગ કાર્ડ  આપ્યું.

એમનું વિઝીટીંગ કાર્ડ મુલાયમ મખમલના કાપડ પર અંકિત હતું ને વિગત આમ હતી.

” શ્રી.શ્રી.શ્રી. ૧૦૦૮… શ્રીમાન ચોટલી પ્રસાદ.”.

   “નારદપ્રસાદ બ્રહ્માજી”

 ” બ્રહ્મ નિવાસ..બ્રહ્મ માર્ગ….પાલક પથ ને સંહાર માર્ગ  જતાં સર્જન ટેકરી ઉપર.”

જો ભાઇ ગોદડિયાજી હું અગત્યના કામે આવ્યો છું ને મને કોઇ ઓળખતું નથી. તો આપ

મને મારા કાર્યમાં જરુરી મદદ કરશો ને આપની સાથે ગુજરાત લઇ જશો એવી આશા છે.

મેં કહ્યું ચાલો ત્યારે એમ અમે બંન્ને અમદાવાદ સરદાર પટેલ વિમાની મથકે ઉતર્યા.

વિમાન મથકથી બહાર આવતાં કહે ” નારાયણ…નારાયણ..નારાયણ…હે નારાયણ”

મેં કહ્યું ” અહિં પેલા ઉંઝાના ધારાસભ્ય નારણકાકા રહે છે. એમને મલવું છે. કેમ તમે પણ

પાટીદાર અનામતના સમર્થક છો.? આવેદન પત્રક આપવું છે કે સમર્થન મેળવવું છે.?”

“ચોટલીપ્રસાદ તમે એમને નહિ મળી શકો કેમકે ગુજરાતમાં ક્યારેય આનંદમાં ના જોવા મળે

છતાંય નામ આનંદીબેન હોય એવાં બહેન સત્તા સ્થાને  છે. એમણે આ બધા ધારાસભ્યોને

ખાસ પોલિસ રક્ષણ આપ્યું છે.”

” ચોટલી પ્રસાદ કહે  આ ધારાસભ્ય એટલે શું ? આ પોલિસ એટલે શું.?પેલા નારાયણજીને

કેમ પોલિસ રક્ષણ આપ્યું છે.?”

મેં કહ્યું રાજ્યમાં કાયદા બનાવવા ને જનતાનાં કામ કરવા માટે જેતે વિસ્તારમાંથી ચુંટાય

એને ધારાસભ્ય કહેવાય.

” પણ  હવે તો આવડા ધારા (કાયદા)નહિ ધાડ (લુંટ) સભ્યો થઇ ગયા છે “

( તગડા પગાર ભાડાં ભથ્થાં રેલ્વે વિમાન મુસાફરી પરદેશમાં શારિરિક ઉપચાર ને ખાયકી )

“પોલિસ જોયા જાણ્યા કે સાંભળ્યા વગર જનતાને ડંડાથી ધોઇ નાખે  તેને પોલિસ કહેવાય.”

“પોલિસ એટલે જનતાના રક્ષકો પણ આ જાત તક્ષક નાગના વંશજ હોય એમ લાઠી ગોળી

કે ટિયર ગેસથી ડંખ દે છે ને ઘરમાં ઘુસી નિર્દોષ વૃધ્ધો કે મહિલાઓને ડંખે છે.”

“પ્રજાની કોઇ પણ માગણીને સરકાર સાંભળે નહિ એટલે જન આક્રોશ ફેલાય તેને દબાવી દેવા

જોર જુલમ થાય પરિણામે જનતા પોતાના ધારાસભ્યને રજુઆત કરે પણ  મત માગતી

વેળા હાથ જોડતા નેતાઓ સાંભળવાને બદલે બેફામ બોલે એટલે જનતા ઘેરાવ કરે.”

“મત જનતાના ને વફાદરી પક્ષની.  જે જનતાએ ચુંટ્યા સરઘસ કાઢ્યાં. હારતોરા કર્યા એમની

વાત નહિ સાંભળવાની બસ મોવડી મંડળ સામે હાથ જોડી ઉભા રહી એમનો આદેશ માનવાનો.

જનતા જવાબ માગવા આવે ત્યારે જનતા કરવેરાના પૈસાથી એમને પોલિસ રક્ષણ આપવાનું

બોલો દુનિયામાં જ્યાં લોકશાહી હોય ત્યાં આવું ક્યાંય જોયું છે ખરું .”

“હે સરદાર સાહેબ આપે લોકશાહી માટે દેશ એકત્ર કર્યો પણ ભારતમાં ખરેખર અવનવું છે.?”

“ભારતમાં લોક્શાહી નહિ પણ  ” શાહીલોક  “સર્વત્ર પથરાયેલા છે. ને કીડીઓની જેમ ઉભરાય છે.”

ગાંઠિયો=

રાહુ ને કેતુ તો સહુને નડે છે

આ જીવતા ભુતો છાતી ચડે છે.

અમારા ચુંટેલા અમને જ નડે છે.

============================================================

સ્વપ્ન જેસરવાકર